Lospalos rcl vp 05-11-2025=Primeiru-Ministru (PM),Kay Rala Xanana Gusmão hala’o inaugurasaun bá planta desalinizasaun ne’ebé konverte tasi-been bá bee-moos iha illa Jaco, sesta (31/10/2025).
Planta desalinizasaun hodi konverte tasi-been bá bee-moos ne’e mai-hosi Timor oan Luciano dos Santos Pereira ne’ebé servisu durante fulan tolu no kosege hetan rezultadu.
Luciano dos Santos Pereira iha ona esperiénsia hodi konverte tasi-been bá bee-moos iha munisípiu Liquiça no mós iha illa Ataúro.
Bee-moos ne’ebé iha ona sei fornese bá rusa no animál fuik sira ne’ebé moris iha illa ne’e tanba konservasaun animál fuik no ekosistema sai hanesan responsabilidade ema hotu nian.
Planta desalinizasaun ne’e ninia na’in loloos maka Ministériu Agrikultura, Pekuária, Peska no Florestas (MAPPF) ho Sekretária Estadu Florestas.
Tuir dadus hosi parte floresta nian katak, oras-ne’e daudaun iha rusa hamutuk 400-resin mak moris iha illa ne’e inklui animál fuik sira sleuk tán.
Serimónia inaugurasaun ne’e akompaña hosi Ministru Agrikultura, Pekuária, Peska no Florestas, Marcos da Cruz, Sekretáriu Estadu Florestas, Fernandinho Vieira, Sekretáriu Estadu Kooperativas, Arsénio Pereira da Silva, Sekretáriu Estadu Komunikasaun Sosiál, Expedito Dias Ximenes no populasaun Valu.
Oras-ne’e daudaun Governu destaka ona Pessoál Seguransa Florestál hodi tau matan bá ai-horis no animál sira iha illa Jaco hamutuk na’in-haat.
Jornalista;vero
Editor;El
