Lospalos rcl vp 09-09-2025 : Secrétariu estadu komunikasaun social (sekoms sigla portugues) serbisu hamutuk ministeriu edukasaun, ministeriu transporte e komunikasaun (mtk) no childfund timor leste segunda feira nee (08-09-2025) fasilita formasaun kona-ba jornal parede dijital ba profesores sira hamutuk ema nain 12 iha munisipiu lautem.
Diretur geral sekoms florindo da costa hatete, objektivu husi formasaun ba jornal parede dijital nee hanesan plataforma dijital ida atu fasilita informasaun husi eskola ba estudante sira, profesor no diretor/a sira liu-liu aktividade eskolar nian.
“Sekoms serbisu hamutuk ho ministeriu edukasaun ho chilfund, atu oinsa fahe esperensia ba mestri sira iha edukasaun liu-liu materia multi media nian, tamba jornal parede dijital ida ne’e ita halo ona lansamentu primeira iha fulan rua liu ba kotuk no agora ita tama ona ba faze formasaun nian oinsa atu hasoru teknologia nee.” dehan diretur geral secoms florindo da costa.
Iha fatin hanesan diretur geral ensinu secundariu tekniku vokasional ministeriu edukasaun deolindo da cruz mos haktuir katak liga ho teknologia modernu ne’e nonu governu liu husi ministeriu edukasaun iha ona planu no tau ona orsamentu katak tinan oin sei fo prioridadee liu ba sistema dijitalizasaun iha area edukasaun hodi hafasil publiku atu hatene aktividade eskola nian.
“Ministeriu edukasaun laos laiha planu maibe tau ona orsamentu ba iha kapital menor iha 2026 siknifika ita nia utilizasaun dijital atu moderniza, ita nia dijitalizasaun sistema edukativu sai prioridade ba edukasaun, ba jornal parede laos buat foun maibe ita moderniza katak saida deit mak ita divulga iha nee laos ita deit mak hatene maibe mundu tomak bele hatene ita nia dados, vizaun no misaun.” tenik diretur geral ensinu secundariu tekniku vokasional ministeriu edukasaun.
Iha biban ne’e, diretur ensinu secundáriu geral ninu konis santana lospalos enio amaral lopes agradese no orgulu ba secretariu estadu komunikasaun social ho nia parseiru serbisu hamutuk bele lori ona programa referidu mai iha sira nia eskola hodi fo formasaun ba profesores sira.
“Agradese ba oin loron bele hala’o formasaun iha area jornal parede dijital, hau nudar diretur orgulu ba formasaun ida ne’e tamba pela primeira vez halo iha ami nia eskola, liu-liu liga ba multi-media nian tamba nee, espera katak ba profesor materia multi-media nian bele iha koñesimentu iha area dijital nune ami bele promove ami nia aktividade eskola nian liu husi jornal parede ami nian,” nia agradese.
Entretantu iha aktividade abertura formasaun jornal parede dijital ne’e hala’o iha eskola secundáriu geral ninu konis santana lospalos ne’ebe hetan partisipasaun profesores/a husi eskola nino konis santa rasik, husi eskola secundariu lere ana timor, eskola secundariu tekniku vokasional no° 1 no 2. inklui ensino tekniku administrasaun (eta) dom bosco fuiloru.
Jornalista : Veru
Editor : Formador/JPD-Secoms
