Lospalos rcl vp 14-10-2026= Autoridade Munisipál Lautém, liu husi Direção Servisu Programa Nasionál Dezenvolvimentu Suku (PNDS) Munisípiu Lautém, hala’o atividade 𝑹𝒆𝒇𝒓𝒆𝒔𝒉𝒊𝒏𝒈 𝑻𝒓𝒂𝒊𝒏𝒊𝒏𝒈 𝒏𝒐 𝑨𝒕𝒖𝒂𝒍𝒊𝒛𝒂𝒔𝒂𝒖𝒏 𝑫𝒂𝒅𝒖𝒔 𝑺𝒊𝒔𝒕𝒆𝒎𝒂 𝑰𝒅𝒂 ba funsionáriu sira iha área finansas, sosiál no tékniku, husi nivel munisipál to’o postu administrativu sira iha Munisípiu Lautém.
Atividade ne’e hala’o durante loron haat (4) ho métodu 𝑶𝒏-𝒕𝒉𝒆-𝑱𝒐𝒃 𝑻𝒓𝒂𝒊𝒏𝒊𝒏𝒈, ne’ebé hetan asisténsia téknika husi ekipa nasionál kona-ba utilizasaun Sistema Ida. Treinamentu ne’e nia objetivu mak atu reforsa koñesimentu no kapasidade funsionáriu sira, nune’e bele kompleta no atualiza dadus ba tinan 2025 no 2026 iha sistema refere.
Sekretáriu Munisipál Planeamentu, Investimentu no Dezenvolvimentu Integradu (PIDI), 𝗧𝗶𝗯𝘂𝗿𝘀𝗶𝗼 𝗗𝗼𝘀 𝗦𝗮𝗻𝘁𝗼𝘀, hateten atividade ne’e sai oportunidade importante atu hamutuk tau hanoin no fahe ideia entre ekipa PNDS munisipál no ekipa nasionál, liuliu atu haree no verifika dadus ne’ebé funsionáriu sira fornese no hatama ona iha sistema no Nia mós hato’o agradese ba Ministériu Administrasaun Estatál (MAE) no ekipa nasionál sira ne’ebé organiza no fó apoiu tékniku ba atividade ne’e, hodi hametin prosesu atualizasaun no jestaun dadus iha nivel munisipál.
‘’ Atividade ne’e sai oportunidade importante atu hamutuk tau hanoin no fahe ideia entre ekipa PNDS munisipál no ekipa nasionál, liuliu atu haree no verifika dadus ne’ebé funsionáriu sira fornese no hatama ona iha sistema no terinamentu durante loron haat nian, ekipa nasionál sei fasilita no fó asisténsia direta ba funsionáriu PNDS sira husi munisípiu no postu administrativu sira. Liuhusi oportunidade ne’e, partisipante sira bele husu pergunta no hetan esplikaun kle’an kona-ba prosesu no prosedimentu tékniku iha Sistema Ida.
Nia esplika katak, MAE lansa ona sistema ne’e iha tinan kotuk, no agora iha kompromisu atu kompleta dadus ba tinan 2025 no 2026 to’o iha fulan Dezembru 2026. Ida-ne’e importante atu asegura katak dadus sira iha sistema bele liga ho Portal Munisipál no fasilita asesu ba públiku.
“Agora ita tama ona ba era dijitál, nune’e ita hotu iha responsabilidade atu asegura katak dadus ne’ebé hatama iha sistema loos, kompletu no disponivel atu públiku bele asesu,” nia afirma.
Durante treinamentu ne’e, ekipa nasionál sei fó apoiu ba funsionáriu sira iha área finansas, sosiál no tékniku, inklui ajuda atu kompleta no submete dadus sira ne’ebé durante ne’e seidauk hatama ka seidauk submete ho kompletu iha sistema.
Tuir Sekretáriu Munisipál, maski sistema ne’e utiliza ona iha tinan kotuk, sei iha difikuldade balun iha prosesu hatama dadus, liu liu iha nivel postu administrativu. Tanba ne’e, treinamentu ne’e sai oportunidade atu partisipante sira bele komprende didi’ak prosedimentu sira, hodi evita sala no asegura katak dadus ne’ebé hatama iha sistema tuir regra no prosedimentu ne’ebé aplika.
‘’Ho realizasaun atividade ne’e, espera katak funsionáriu PNDS sira iha Munisípiu Lautém sei aumenta sira-nia kapasidade téknika iha jestaun no atualizasaun dadus, nune’e bele apoia transparénsia, efisiénsia no asesu ba informasaun públika liuhusi sistema dijitál’’
Jornalista;Sili
Editor;EL
