Lospalos rcl vp 31-10-2026= Sekretáriu Estadu Komunikasaun Sosial (SEKOMS), Expedito Loro Dias Ximenes lansa programa media tour ne’ebe organiza hosi AJTL, TLPU NO UPJTL hodi lori jornalista ba área fronteira no rural.
Objetivu hosi media tour ne’e hodi hametin ligasaun entre mídia no komunidade, no mos permite jornalista sira haree no kompriende diretamente realidade no nesesidade komunidade iha area rural.
SEKOMS Expedito Loro Dias Ximenes, hatete, liberdade imprensa fó benefísiu importante ba jornalista no povu tanba mídia iha papél importante atu habelar informasaun loos ba públiku.
“Liberdade imprensa fo benefisiu ba povu no papel media importante, jornalista sira presiza kontinua besik komunidade liuliu iha área fronteira no rural, atu bele rona diretamente komunidade nia esperiénsia, preokupasaun no nesesidade, no lori sira-nia lian ba públiku”. Dehan SEKOMS Expedito Loro Dias Ximenes iha Palasiu Governu, 30/09/2026.
Expedito hatete, Governu fó atensaun ba komunikasaun no jornalizmu, tanba jornalista sira sai ponte entre governu, instituisaun no komunidade.
“Liu husi media, informasaun kona-ba realidade povu bele to’o ba públiku, enkuantu preokupasaun komunidade bele hetan atensaun husi instituisaun kompetente, tanba ne’e apoia governu la signifika intervensaun ba politika editorial”.
Nia afirma, Governu sei respeita independénsia media, liberdade jornalista sira no prinsipiu jornalístiku inklui independénsia no imparsiálidade.
Nia mós alerta kona-ba Inteligénsia Artifisiál, ne’ebé bele fó benefísiu ba jornalista, maibé iha mos risku ne’ebé presiza komprende no jere ho responsabilidade.
Nia husu atu media sosial no plataforma dijitál uza ho responsabilidade, fo informasaun bazeia ba faktu, verifikasaun no étika jornalístika.
Prezidente AJTL, Zevonia Vieira, hatete AJTL sei lori jornalista sira ba munisipiu Bobonaru, enkuantu TLPU sei lori jornalista ba Covalima.
“Atividade ne’e sei fó atensaun ba preokupasaun komunidade iha fronteira, inklui edukasaun, saúde no asesu ba servisu públiku”. Nia informa
AJTL mós sei hala’o sosializasaun kona-ba seguransa dijitál ba joven no estudante sira iha Munisípiu Bobonaru.
Prezidente Uniaun Profisional Jornalista Timor-Leste (UPJTL), Horacio Babo, hatete, organizasaun jornalista tolu sei hala’o Media Tour ho apoiu hosi Governu.
“Organizasaun hirak-ne’e maka Uniaun Profisional Jornalista Timor-Leste (UPJTL), Asosiasaun Jornalista Timor-Leste (AJTL), no Timor-Leste Press Uniaun no (TLPU)”. Nia dehan
Horacio Babo deklara, Media Tour sei aproxima jornalista sira ho komunidade iha área rural, atu haree diretamente situasaun no realidade lokal.
“Durante ita-nia atividade, jornalista sei halo visita, interasaun no sosializasaun ho lideransa lokal, funsionáriu públiku no komunidade”.
Jornalista sira mós sei halo kobertura kona-ba atividade sosial, dezenvolvimentu no dezafiu ne’ebe komunidade sira enfrenta iha área rural.
“Ami hakarak média sai ponte entre komunidade, instituisaun públika no públiku”. nia hatutan.
Atividade ne’e sei inklui jornalista hamutuk na’in 10 hosi média online, imprensa, televizaun no rádio.
“Ita-nia Jornalista sira sei sosializa literasia média ba komunidade no funsionáriu, inklui asesu, uza no fahe informasaun ho responsabilidade”.
Entertantu: Atividade Media Tour ne’e realiza nu’udar parte husi komemorasaun Loron Liberdade Imprensa no loron Balibo Five ne’ebé sei komemora iha 16 Outubru.
Jornalista;linda
Editor;El
